(дел 6)
Секој човек на светот си има своја дефиниција за среќата. А, ние сакаме да разбереме за многу дефиниции, да го откриеме гледиштето на многу луѓе на прашањето „Што е среќа?“. Ве запознаваме со Стефан, Полина и Владимир кои со нас ја споделија нивната перцепција за среќата.
Стефан Марковски, писател
„Среќата е глагол“. Нејзиното оддржување се заснова на активен процес, труд, работа. Кога е сведена на единствено материјално достигнување, таа е краткотрајна. Кога овие достигнувања се постигнуваат, треба да се прошират нивните ограничувања. Стабилната среќа е секојдневно соочување со стравовите и победа над нив; победа која ги проширува хоризонтите на личноста. Среќата е дел од природата и аспект од здравјето на секој организам; ниту еден организам не е целосно здрав ако не е среќен.
Полина Ѓорѓиева, магистер по кривично право
За среќа не барам многу. Доволно ми е утрото, сончево; доволно ми е кафето, црно и јако; доволен ми е погледот, кон Битола. Доволно ми е само ова за денот да започне – со насмевка. А за насмевката да опстои природна на моето лице, во текот на целиот ден… И за тоа не барам многу. Доволна ми е смс – порака од драга личност. Доволна ми е позитивната енергија на моите блиски. И да, доволна ми е совршената линија на мојот ајлајнер. Не е скапа среќата.
Владимир Видановски, фотограф
Среќа е мирното спиење со убав сон. Среќа е првиот утрински чекор. Среќа е мирисот на кафе, првата голтка и започнувањето на денот. Среќа е чекорењето по ритамот на добрата музика пред средбата со пријателите. Среќа е споделувањето на позитивна енергија и хармонија со другите околу тебе. Среќа е прошетка на чист воздух. Среќа е чувството на исполнетост додека го работиш она што те тера да одиш напред. Среќа е добрата забава и лудите ноќи поминати со оние кои ти значат. Среќа е топлиот кревет по долгиот ден. Среќата е тоа што предизвикува светот, барем мојот, да се врти, да не престанува, да инспирира и да ме поттикнува да творам. Среќата е тоа што ме тера да не се откажувам.
При објавување на материјали од порталот www.hybread.mk во друг медиум, задолжително наведете го изворот од кој е преземен текстот
