Агата Кристи е родена во 1890 година во Англија во добро ситуирано семејство. За време на Првата Светска Војна работела како сестра во болница, а тоа искуство подоцна ќе и помогне во оформувањето на приказните во своите книги.
Агата Кристи се наоѓа во Гинисовата книга на рекорди како најдобро продаван автор. Таа е длабоко почитувана како мајстор на неизвесноста, заговорот и опишувањето на ликовите од повеќето од нејзините современици.
Но, иако пишувала за мистериозни работи и ги откривала во своите романи, една мистерија врзана токму за неа и ден денес останала неодгатната.
Во една студена декемвриска вечер во 1926 година, 36-годишната Кристи исчезнала од нејзиниот имот во Санингдејл, Беркшир, Велика Британија. Наводно, познатата писателка оставила порака во која вели дека заминува на одмор, но пронаоѓањето на нејзиниот автомобил упатувало на нешто посериозно. Го пронашле покрај еден каменолом, недалеку од нејзината куќа, напуштен, со отворена хауба и со вклучени светла. Внатре биле само крзненото палто на Кристи, нејзината возачка дозвола и торба со облека, но не и писателката.
Веста за исчезнувањето на Кристи се проширила со светлосна брзина и почнала масовна потрага по неа. Повеќе од 1.000 полицајци и 15.000 волонтери го прочешлале теренот, а специјални тимови ги пребарале околните езера и реки.
До крајот на неделата, исчезнувањето на Кристи станало национална опсесија. Многумина се сомневале на сопругот на писателката, полковникот Арчи Кристи. Стариот полковник имал афера со многу помладата Ненси Нил и не се ни обидел да го скрие тоа од сопругата. На денот на исчезнувањето на Агата, таа и сопругот имале сериозна кавга откако Арчи ѝ соопштил дека сака да го помине викендот со љубовницата и наводно и побарал развод.
На 19. декември, 1926. година Агата била препознаена како гостинка во хотелот „Стар лебед“ во Јоркшир, каде била пријавена како г-ѓа Тереза Нил од Кејптаун. Агата никогаш не го образложила нејзиното исчезнување.
Иако двајца доктори дијагностицирале дека страда од психогена фуга, мислењата за тоа кои се всушност причините за нејзиното исчезнување остануваат поделени. Едно од мислењата е дека доживеала нервен слом, предизвикан од природната склоност за депресија, претходно влошена од смртта на нејзината мајка (која се случила порано истата година) и неверството на нејзиниот сопруг.
Реакцијата на јавноста во тоа време била негативна, а многу луѓе верувале дека со тоа само се обидувала да го привлече вниманието на јавноста. Други пак, шпекулираат дека се обидувала да ја натера полицијата да верува дека нејзиниот сопруг ја убил.
Нејзиното единаесет дневно криење од очите на јавноста и денес останува една од најголемите светски мистерии.
При објавување на материјали од порталот www.hybread.mk во друг медиум, задолжително наведете го изворот од кој е преземен текстот.
