На 28 април (четврток), со почеток од 19 часот, во Клуб-ресторанот на МКЦ ќе се одржи промоција на новата книга на Ана Јовковска, „Емотивен талог“.
Ана Јовковска, научна истражувачка, магистерка по културолошки студии, дипломирана новинарка, колумнистка, ТВ-уредничка, специјалист за односи со јавност и тренер по комуникациски вештини, веќе добро ја познаваме како автор. По четирите објавени книжевни дела, сега ни се претставува со едно поинакво четиво, збирка од раскази, колумни и есеи именувани како „Емотивен талог“. Илустрирајќи ги своите лични доживувања, интимни искуства и длабоко почувствувани ситуации, таа ги преиспитува релациите на себството и Другиот, слободата и љубовта, диктатот на технологијата, моралот и ропството, социо-емоционалниот развој на децата, консумеризмот наспроти (не)грижата за природата… но среде сето тоа, Јовковска гласно го поставува прашањето за среќата.
Овие приказни од женската кујна, како што стои во поднасловот, несомнено најдобро може да ги претстави женскиот глас. Ана Мартиноска и Соња Стојменска-Елзесер ќе бидат во улога на промоторки, но пред сè, и на читателки. Сиот разговор за книгата, што ќе биде мултимедијална синтеза од разговор, музика и дружење, ќе ви помогне да се приближите до суштината на оваа книга, како што вели авторот на поговорот Гоце Смилевски, на оваа „топла човечка порака и препорака за искрено и вдаховено живеење“.
Поддржете ја македонската женска проза, бидете дел од настан вреден да се посети и обезбедете си примерок од книгата која ќе остане вгнездена во вашето срце. Добрите настани долго се паметат, а убавите книги уште подолго.
