Во книжарниците на Издавачки центар ТРИ пристигна најпознатата книга од Морис Леблан која го означи почетокот на една нова несекојдневна едиција насловена како „Безвременски“.
„Безвременски“ ќе ги шири книгите кои важат за основа на целата книжевност – класични дела од истакнати автори, нивните најпознати, но и помалку познати книги кои е време да блеснат во квалитетно издание на македонската книжевна сцена. Книги кои секој треба да ги прочита и кои треба да го најдат своето место на полиците на сечија домашна библиотека.
Целта на едицијата е класиците да бидат широко достапни во изданија какви што заслужуваат, со добри преводи и со модерен дизајн. Не случајно едицијата започнува со книга која важи за најславна меѓу крими-романите, книга која за првпат се објавува во превод на македонски јазик.
Други наслови кои се очекува да пристигнат под знакот на „Безвременски“ и кои наскоро следуваат се „Големиот Гетсби“ од Френсис Скот Фицџералд, „Сликата на Доријан Греј“ од Оскар Вајлд, „Записи од подземјето“ од Фјодор Достоевски, „Црниот мачор – раскази за мистеријата“ од Едгар Алан По. Ова е првиот бран класици, но оваа едиција и понатаму ќе се шири. Да не се заборави од каде започна книжевноста, кои автори се нејзините столбови што треба да ги негуваме.
Класиките се книги создадени од дамнешни генерации за новите и идни генерации, традиција која не бледнее, патоказ не само во литературата туку и во постоењето – порака која со оваа едиција македонскиот издавач ТРИ ја праќа до секого.
